تواصلت تدوينات النائب عن مجلس نواب الشعب ياسين العياري الذي اعتبر ان ما حصل ليلة البارحة في تونس ليس الا "انقلابا عسكريا" كما وصفه.
و جاء في تدوينة العياري :"
اليوم الأول :
- يشرع وحده، بالمراسيم
- يحط حكومة وحده، دون ثقة البرلمان
- يحط حكومة مسؤولة قدامه وحده
- يترأس النيابة العمومية
- يبعث العسكر للبرلمان
- يخترع "التجميد" و الدستور يقول إنعقاد دائم.
- يحط وزير داخلية، بلاش حكومة
قال لويس الرابع عشر : l état c'est moi!
الدستور هذه المرة فعلا أكله الحمار!
و هذا مازلنا اليوم الأول!
شوف قيس الرابع عشر،
لا يغرنك صراخ "بالروح بالدم"! صرخوا هكذا للجميع من قبلك.
هاذوكم يحركهم مرض تونسي قديم متجذر، أعور عين الي ما نحبوش و ميسالش أعميني! مرض إسمه في التراب و لا أولاد *****ب.
في بالهم الي تو، بش تتحل مشاكلهم و معادش تموت العباد على أعتاب مستشفياتهم.
سذج!
ستموت العباد على أعتاب المستشفيات، فقط، لن يمكن لهم الإحتجاج و لا التعبير و لا التغيير!
لا زادة، لن أقف مع الغنوشي و مخلوف في باب البرلمان!
هم لا يحمون الديمقراطية! هم يحمون أنفسهم!
الديمقراطي ديمقراطي حتى في مكتب المجلس، ما يعديش بالمغالبة و يخرق الإجراءات! ديمقراطي حتى في حزبه ما يأجلش المؤتمر!
و مخلوف يلوج على الإعدامات و كي تقمعو بعض التوانسة يلحس للبوليسية! كان جاء غنوشو الي عمل انقلاب راهو تو يدور في باقة يلم في العباد.
أنتم تدافعون عن أنفسكم لا على الديمقراطية، و ما حبيتوش تفهمو، أي حاجة أنتم عنوانها و واجهتها، التوانسة معادش عينهم فيها و لو كانت باب الجنة.
مانيش بش نعمل زادة كي عبو صباحي، جرح نرجسي و غل و كره يخليها تصفق لإنقلاب! أكهو يا نحكم يا موتوا الكل : تلقى فعلك!
قيس الرابع عشر،
خلي نجيبوها من الإخر،
حاربت بن علي بما أقدر
عطيت بابا للوطن
شديت الحبس و المنفى
ضحيت بصحتي و عرضي و فلوسي و عايلتي
نهار الي تحملت المسؤولية، على عكسك يا كذاب، إحترمت القسم و الدستور.
خدمت بقلب و رب نهار و ليل، لا فكيت متاع الناس، لا خذيت متع الناس.
يزي، خالص معاه الوطن!
تحبو العصا و ملك تبوسوله يديه، ملك قروسطي بلا دستور حتى؟ صحة الحصان و هنيئا لكم لأنكم تريدون.
قيس،
كان عندك حسبة معايا، تفضل، نعدي ربطيتي مهما كانت ظالمة و نخرج، الأمر لا يخيفني و نستنى فيه من يوم قلت لا لبن علي من تونس، تتفكر بن علي، هذاكا الي كنت تخاف ضله .
كان ما عندكش حسبة معايا، نقرى فاتحة على قبر بابا و فاتحة على قبر زهير اليحياوي و عبد الرحمان سوقير، عندي 77 أورو في الكونط، تو ندبر حق تسكرة و نسبق و بعد نخلط أولادي أول ما نكري و نبدأ نخدم.
أخير ألف مرة ولدي يعيش متغرب عمره كامل لكن حر، على يوم واحد من حكم تحت الإنقلاب.
الله غالب، إجتهدت و حاولت بالي نقدر، من 2007 باش نخلي لولدي بلاد ما خير، فشلت، نغزر للعباد تصفق إنها تحت فرعون و نسأل في روحي، أكل هذا من أجل هذا؟
tout ça pour ça!
التوانسة المساندين، الفرحانين، أتفهم فرحكم و أشفق عليكم.. حتى نهار 7 نوفمبر فرح الناس صادقين.
غلطوكم، ضد الديمقراطية المغشوشة هي الديمقراطية الصحية موش الحديد و النار.
تو عمل دستور وحده و غار و فك، ما عندك ما تعمله، كي يفوت ال 30 يوم، اش بش تعمله تره؟ يكون فاتك ليلة الدخول يا بهلول!
ريتو المظاهرات و الميمز و التنبيرات و الراب و الكلاشات و النقد و التكركير.. أصبح إسمها تطاول على رموز الدولة تستوجب المحاسبة و السجن و مازلنا في اليوم الأول!
تونس التي تعرفوها، إنتهت هذه الليلة، الحلول موش برشة، حرب أهلية و لاجئين و لا أحد آمن أو بداية العسكرة و رصاص دفع ثمنه توانسة يطلق على توانسة و حكم بالحديد و النار من أبله لا يقدر على تسيير مشرب متع كلية و برشة طحانة دايرة بسيدكم و مولاكم.
إلى قيس الرابع عشر، أنا أتطاول عليك، أتنفس هواء آخر ليلة حرية في تونس، فأفعل ما أنت فاعل.
إلى قيس الرابع عشر، أنت جبان و كذاب، أنت لم تستعمل نصا دستوريا، بل عملت إنقلاب عسكري، تي إسترجل et assume
أخطاك من لوغة رغبة الشعب! الشعوب تعبر عن رغباتها بالإقتراع و الإحتجاج لتقويم الإقتراع! بالك الشعب حط ورد في الصندوق لقاوه خراء! لا حطو خراء، فوجدو ما حطو! الإنقلابات هي رغبة من يملك البنادق لا رغبة الشعب.
و لا قرار من قراراتك له سند قانوني، كلها تفرضها بالبندقية، تي كفى إستبلاها و قول راك إنقلابي، أقسمت على الدستور ثم أكلته!
إلى الغنوشي، لم تشارك و لم تساهم في ثورة الشباب، هزيتها على طبق، تطلب الأمر 10 سنوات فقط، لتلتهم كل ما فيها، ما حلمت به أجيال! كل شيء! ليخرج الشعب فرحا سعيدا أنه فقد كل شيء غير أعطيه يرتاح منك! لن ينفعك باراشوك اليوم.
إحمد ربي فقط أغلقوا الباب في وجهك، ما هرسوكش كما تهرس قدام نفس الباب أمهات شهداء الثورة.
جماعة ما إنجموش نكونو أتعس ملي أحنا فيه، جميل :) فقط قليل من الصبر!
قلنا هذا تحت الترويكا و مهدي جمعة و الشاهد.. و كنا دائما مخطئين!
il y a toujours pire!
إسألوا شيماء الصباغ.
وداعا الجمهورية التونسية، تنجم تزرع تفاحة و ما تطلعلكش، أما كي تزرع بصلة، حتى كان طلعت، تطلع بصلة.
أقيموا بني أمي صدور مطيكم، فإني إلى قوم سواكم أميل..
مانيش هارب من المعركة، معركتي في بالي مع الناس لتونس ما خير، زعمة جاد عليا، شباب و خضراء و رقمية و إقتصاد مفتوح و بلاش فساد، مستعد نقاوم دكتاتور إذا الناس تحب حرية، ما إنجمش نحارب دكتاتور الناس تحب عليه!
الإنقلابات تحبط في ال48 ساعة الأولى، كان فقتو من السكرة و بش تدافعو على جمهوريتكم هاني معاكم، ما عينكمش، يزي سي بون، ضحيت ما يكفي، ماو قلنا خالص معاه الوطن و تعرفو ما يصلح بيكم و ربي يهني سعيدة بسعيد! و هنيئا لكم بما تريدون.
فقط شباب، فازة غاضتني برجولية، لا علاقة بالمكتوب الفوق، ثمة موضوع معدي عليه 4 شهر خدمة، بالزهر حضر اليوم، عاد كوم خدمت و تعبت عليه، ننشره كومام على الفازة
هاو الرابط، منغير ما تنزل، تونس الي يهبط فيها، معادش فيها بلاصة لمثله، يحكمكم أبله مجنون يحكي على 13 مليار و نص منهوبة جات في تقارير :)، هذاكا حده، هذه سرقة متع 1800 مليار.
https://www.google.com/url?q=https://mel7it3.blogspot.com/2021/07/blog-post.html&source=gmail&ust=1627367522075000&usg=AFQjCNFNE_krxAuLdGNDa4k7eW9k5E7JjQ">https://mel7it3.blogspot.com/
كان حيانا ربي، تو نذكركم نهار ، أني جيتكم وسط الهستيريا و قلتلكم!
وداعا!
ياسين العياري، ديمقراطي".